«Halkbank» TPJB milli programma önümlerine we enjamlara karz berýär
Türkmenistanyň paýdarlar täjirçilik banky «Halkbank» milli programma önümleriniň işlenip düzülmegi we enjamlaryň önümçiligi, şeýle hem olary türkmen kompaniýalaryndan satyn almak üçin karzlary berýär.
Şeýleleikde, milli programma önümlerini döretmek we öndürmek üçin karz 5 ýyllyk möhlete ýylyna 2% bilen berilýär. Karzyň möçberi maýa goýum taslamasynyň gerimine baglydyr. Karzyň ýeňillikli möhleti 2 ýyldyr.
Milli programma önümlerini satyn almak we işe girizmek üçin karzy edil şunuň ýaly göterim bilen 3 ýyllygyna alyp bolýar. Karzyň ýeňillikli möhleti – 6 aý.
Ýokarda sanalan karzlary alnanda girew goýulmalydyr. Karzy üzmegiň çeşmesi üçünji tarapyň kepilligi bolup bilýär.
Milli programma önümlerini döretmäge we satyn almaga karzlar ýurdumyzyň IT-senagatyny ösdürmäge, şeýle hem işewürlige innowasiýalary ornaşdyrmaga we bäsdeşlige ukyplylygy ýokarlandyrmaga kömek etmäge niýetlenendir.
Ozal Türkmenistanda kiçi we orta telekeçilige milli programma önümlerini döretmäge we enjam öndürmäge, şeýle hem taýýaryny satyn almaga we işe girizmäge karz bermegiň tertibi tassyklanypdy.
ORIENT habarlar
