«Halk market» söwda tory Kazanyň kompaniýasynyň saglyk önümlerini mahabatlandyrar
Türkmenistandaky iň uly söwda torlaryndan biri bolan «Halk market» Russiýanyň adamyň saglygyny gowulaşdyrmaga we durmuşynyň hilini ýokarlandyrmaga gönükdirilen önüm öndürmekde ýöriteleşen «Naturalnoýe zdorowýe» kompaniýasy bilen şertnama baglaşdy. Şereketiň baş edarasy we esasy önümçilik desgalary Tatarstan Respublikasynyň Kazan şäherinde ýerleşýär.
«Derman ösümliklerinden we minerallardan ýokary hilli saglyk önümlerini mahabatlandyrmak barada» ylalaşyga gol çekişmek 15-nji martda Aşgabatda Söwda-ykdysady, ylmy-tehniki we medeni hyzmatdaşlyk boýunça bilelikdäki türkmen-tatar iş toparynyň 8-nji mejlisiniň we işewürlik forumynyň çäginde geçirildi.
«Naturalnoýe zdorowýe» jogapkärçiligi çäklendirilen jemgyýetiň baş müdiri Sergeý Patrakowyň aýmagyna görä, bu ylalaşyk «gysga wagtda eksportyň täze ugruna girmäge we Türkmenistanyň myhmansöýer halkyny öz önümleri bilen tanyşdyrmaga» mümkinçilik berer.
Kompaniýa, önümlerini gaýraüzülmesi bolmadyk we saglyga iň ýokary peýdany berip, bedeni ýaşardýan, bejerýän we dikeldýän dürli otlaryň we ösümlikleriň ekstraktlary garylan «energiýa maglumat önümleri» hökmünde tanadýar. Işiniň ikinji möhüm ugry bolsa, ýokary tehnologiýaly materialdan anatomiki önüm öndürmekdir. «Naturalnoýe zdorowýe» jogapkärçiligi çäklendirilen jemgyýet 5 ýyl bäri Russiýa Federasiýasynyň çäginden çykyp, Birleşen Arap Emirlikleri, Malaýziýa, Gazagystan, Azerbaýjan, Özbegistan we ş.m. ýaly 10-dan gowrak ýurduň bazarlarynda öňe gitmegi başardy.
ORIENT news
