Türkmenistan bilen BMG-niň Ilat Gaznasynyň hyzmatdaşlygy üstünlikli diýlip ykrar edildi
Çarşenbe güni geçirilen duşuşygyň barşynda Türkmenistanyň Daşary işler ministriniň orunbasary Mähri Bäşimowa we BMG-niň Ilat Gaznasynyň (UNFPA) Türkmenistandaky wekilhanasynyň müdiri Olaf Ronni Lindstrom hyzmatdaşlygyň ileri tutulýan ugurlary boýunça pikir alyşdylar.
Taraplar Türkmenistanyň ministrlikleri we pudak edaralary tarapyndan gol çekilen Ýyllyk meýilnamalaryň çäklerinde UNFPA-nyň üstünlikli işini bellediler. Hyzmatdaşlygyň şeýle ugurlaryndan biri 2022-nji ýylda ýurdumyzda ilatyň we ýaşaýyş jaý gorunyň uçdantutma ýazuwyny taýýarlamak we geçirmek üçin Döwlet statistika komitetine UNFPA tarapyndan berlen tehniki ýardamdyr.
Gepleşikleriň dowamynda gender deňligi we aýal-gyzlaryň hukuklary we mümkinçilikleri babatynda hyzmatdaşlyk meseleleri ara alnyp maslahatlaşyldy. Şu nukdaýnazardan, wise-premýer türkmen tarapynyň “Türkmenistanda aýallaryň saglygy we maşgaladaky ýagdaýy baradaky synyň” netijeleri boýunça hasabaty taýýarlamakda UNFPA-nyň berýän goldawyna ýokary baha berýändigini aýtdy.
Şeýle hem, Türkmenistan bilen UNFPA-nyň arasynda mundan beýläkki hyzmatdaşlygyň geljegi uly ugurlarynyň ýaşlar syýasatyndaky hyzmatdaşlygydygy nygtalyp geçildi.
ORIENT news
