Aşgabatda Türkmenistanyň we Bütindünýä bankynyň hyzmatdaşlygynyň ileri tutulýan ugurlary ara alyp maslahatlaşyldy
Türkmenistanyň Maliýe we ykdysadyýet ministri Serdar Joraýew Bütindünýä bankynyň (BB) ýerine ýetiriji direktory Dominik Fawre bilen duşuşyk geçirdi, onda taraplar hyzmatdaşlygyň ileri tutulýan ugurlaryny ara alyp maslahatlaşdylar we özara gatnaşyklaryň geljekdäki meýilnamalaryny bellediler.
Esasy temalaryň biri Türkmenistanda COVID-19 seslenmek taslamasy boldy, onuň ýerine ýetirilmegi üçin Halkara täzeleniş we ösüş banky $20 mln bölüp beripdi.
Joraýew serişdeleriň köp böleginiň üstünlikli özleşdirilendigini we Türkmenistanyň pandemiýa seslenmäge taýýarlygyny güýçlendirmäge gönükdirilendigini belledi. Fawre ýurduň bu taslamany ýerine ýetirmek boýunça sebitde öňde barýandygyny aýtdy we bu mesele boýunça BB-nyň mundan beýläkki hyzmatdaşlyga taýýardygyny nygtady. Şunuň bilen baglylykda, Türkmenistanyň hem gyzyklanan halatynda taslamanyň uzaldylma mümkinçiligi we goşmaça maliýeleşdirme meseleleri ara alnyp maslahatlaşyldy.
Söhbetdeşler şeýle hem Türkmenistanda miwe-bakja önümlerini öndürýän hususy öndürijileri goldamaga gönükdirilen bilelikdäki taslamanyň ýerine ýetirilmeginiň aýratynlyklaryny ara alyp maslahatlaşdylar, şeýle hem ýurt boýunça täze maksatnamasyny taýýarlamagyň meselelerini we ýurtda Bütindünýä bankynyň wekilhanasynyň baştutanyny bellemek meselesini ara alyp maslahatlaşdylar.
Türkmenistanyň we Bütindünýä bankynyň ýaşyl energetika babatynda hyzmatdaşlygy ösdürmek üçin geljeginiň bardygy bellenip geçildi. Mundan başga-da, geljekdäki özara hyzmatdaşlygyň mümkin bolan ugurlary bolup Bütindünýä banky tarapyndan Merkezi Aziýa ýurtlarynda — Özbegistanda, Täjigistanda, Gyrgyzystanda we Gazagystanda ýerine ýetirilýän taslamalar çykyş edip biler.
Duşuşygyň ahyrynda Fawre 2023-nji ýylyň oktýabrynda Marokkoda Bütindünýä bankynyň her ýylky maslahatynyň bolup geçjekdigini ýatlatdy we ol oňa Türkmenistanyň Maliýe we ykdysadyýet ministriniň gatnaşmagyna garaşýandygyny nygtady.
ORIENT habarlar
