Türkmenistan we IRU ýurtda gümrük işini kämilleşdirmegiň üstünde işleýärler
Türkmenistan we Awtomobil ulaglarynyň halkara birleşmesi (IRU) ýurtdaky gümrük ulgamynyň ösdürilmeginde we sanlylaşdyrylmagynda üstünlikli hyzmatdaşlyk edýärler - diýip, Türkmenistanyň Ministrler Kabinetiniň ýanyndaky Ulag we kommunikasiýalar agentliginiň «Türkmenawtoulaglary» agentliginiň saýtynda habar berilýär.
«Biz gümrügi resmileşdirmekde artykmaçlyk berýän «ýaşyl zolaklaryň» girizilmegi babatynda gümrük gullugy we beýleki döwlet edaralary bilen hyzmatdaşlyk etdik» - diýip, halkara ýol daşamalary (HÝD) we IRU-nyň üstaşyr ulgamy bölüminiň baştutany Tatýana Reý-Belle bilelikdäki iş barada belliklerini aýtdy.
Häzirki wagtda Türkmenistanyň bäş gümrük nokady IRU tarapyndan işlenip düzülen TIR-EPD halkara sanly ulgamyna birikdirildi. Hususan-da, «Artyk» gümrük nokady (Eýran bilen araçäkde), «Parom geçelgesi» (Türkmenbaşy deňiz portunda), «Farap awtoýollary» (Özbegistan bilen araçäkde), «Sarahs awtoýollary» (Eýran bilen araçäkde) we «Garabogaz» (Gazagystan bilen araçäkde).
Türkmenistanda TIR-EPD goşundysyna 2022-nji ýylda badalga berildi. Bu hyzmat HÝD (TIR) kitapçasynyň gümrük ulag resminamasynyň eýelerine – ýük daşaýjysyna ýükleri halkara ugurda ýerleşdirmäge, daşalyşy barada deslapky elektron maglumaty ugurdaky ähli ýurtlaryň gümrük edaralaryna bir wagtda ugratmaga mümkinçilik berýär.
«Bu örän wajyp ädim, ol Türkmenistana sebitdäki HÝD-ny sanlylaşdyrmak bilen baglanyşykly beýleki taslamalara birikmäge mümkinçilik berdi» - diýip, Reý-Belle belledi.
ORIENT habarlar
