Merkezi Aziýa döwletleriniň oba hojalyk ministrleriniň duşuşygy
“Ýyldyz” myhmanhanasynda “Azyk howpsuzlygy we howanyň üýtgemegi boýunça halkara hyzmatdaşlyk” atly Halkara maslahatynyň çäklerinde Merkezi Aziýa döwletleriniň oba hojalyk ministrleriniň duşuşygy boldy.
Utgaşykly görnüşde geçen duşuşyga FAO-nyň Merkezi Aziýa boýunça sebit utgaşdyryjysy, FAO-nyň Baş direktorynyň orunbasary, Ýewropa we Merkezi Aziýa boýunça sebitleýin wekili, Türkmenistanyň, Gazagystan Respublikasynyň, Gyrgyz Respublikasynyň, Täjigistan Respublikasynyň, Özbegistan Respublikasynyň ugurdaş ministrlikleriniň ýolbaşçylary, şeýle hem Eýran Yslam Respublikasynyň wekilleri gatnaşdylar.
Häzirki günde sebitiň we dünýäniň ýurtlarynyň öňünde obasenagat toplumyny has netijeli we daşky täsirlere hem-de ýüze çykýan täze şertlere uýgunlaşmaga ukyply görnüşe getirmek ýaly möhüm wezipe goýuldy.
Köp ýurtlaryň howanyň üýtgemegine uýgunlaşmak we olaryň täsirlerini peseltmek boýunça meýilnamalarynda, ilkinji nobatda, obasenagat toplumyna uly orun bermegi munuň subutnamasydyr.
Howanyň üýtgemeginiň azyk önümçiligine edýän täsiri ikitaraplaýyn häsiýete eýedir. Howanyň gyzmagy hem-de howa şertleriniň üýtgemegi oba hojalyk ekinlerini ýetişdirmekde töwekgelçilikleri döredýär. Şol bir wagtyň özünde howanyň üýtgemeginiň daşky gurşawa ýetirýän ýaramaz täsirini peseltmek, hususan-da, parnik gazlarynyň zyňyndylaryny azaltmak üçin oba hojalyk önümçiligine ekologiýa taýdan arassa “ýaşyl” tehnologiýalary ornaşdyrmak zerurlygy ýüze çykýar.
Soňra birnäçe resminamalara gol çekildi. Olaryň hatarynda Türkmenistanyň Oba hojalyk we daşky gurşawy goramak ministrligi hem-de Birleşen Milletler Guramasynyň Azyk we oba hojalygy boýunça Guramasynyň (FAO) Merkezi Aziýa üçin sebit merkeziniň arasynda “Sanly ýer kadastryň döredilmegine ýardam” atly Taslama resminamasy hem-de Türkmenistanyň Oba hojalyk we daşky gurşawy goramak ministrligi hem-de Birleşen Milletler Guramasynyň Azyk we oba hojalygy boýunça Guramasynyň (FAO) Merkezi Aziýa üçin sebit merkeziniň arasynda “Merkezi Aziýada we Türkiýede guraklaşan hem-de şorlaşan oba hojalyk önümçilik ýerlerinde tebbigy baýlyklary dolandyrmak” atly Taslamanyň 2023-nji ýyl üçin Iş meýilnamasy bar.
