Türkmenistanyň ýaşaýjylary Mahmyt Kaşgarly adyndaky hekaýalaryň bäsleşigine gatnaşyp bilerler
Ýewraziýanyň ýazyjylar birleşmesiniň TÜRKSOÝ guramasy we Türkiýäniň Medeniýet we syýahatçylyk ministrligi bilen bilelikdäki guralýan Mahmyt Kaşgarly adyndaky hekaýalaryň VII halkara bäsleşigine ýüz tutmalaryň kabul edişligi başlandy.
Bu ýyl bäsleşik Türkiýe Respublikasynyň esaslandyrylmagynyň 100 ýyllygyna we TÜRKSOÝ-yň 30 ýyllygyna bagyşlanýar. Döredijilik bäsleşigi dünýäniň ähli türki dilli döwletleriniň ýazyjylar birleşmeleri we edebiýat neşirleri bilen hyzmatdaşlykda geçirilýär.
Gatnaşyjylar bäsleşige müň sözden az bolmadyk we 10 müň sözden köp bolmadyk erkin temadan hekaýa ugradyp bilerler. Işler ozal çap edilmedik ýa-da başga bäsleşiklere gatnaşmadyk bolmaly. Olary 2023-nji ýylyň 15-nji sentýabryna çenli kmahmut2023@gmail.com elektron salgysyna ugratmaly.
Ýeňijileri sylaglamak dabarasy 2023-nji ýylyň 4-nji dekabrynda bolup geçer. Olara pul baýraklary berler.
Mahmud Kaşgarly ähli döwürleriň iň meşhur türkologlarynyň biridir, ony ylmy türkologiýany esaslandyrjy hökmünde ykrar edýärler. Dünýä medeniýetiniň ösüşine uly goşant goşan «Türki dilleriň sözlügi» Mahmyt Kaşgarla degişlidir.
ORIENT habarlar
