Türkmenistanyň gatnaşmagynda Türki dilli ýurtlaryň ýazyjylar birleşmesi döredildi
TÜRKSOÝ-yň başlangyjy bilen Türki dilli ýurtlaryň ýazyjylar birleşmesi döredildi – diýlip, guramanyň resmi saýtynda habar berilýär. Degişli ylalaşyga Türkmenistanyň, Özbegistanyň, Azerbaýjanyň, Gazagystanyň, Gyrgyzystanyň we Türkiýäniň wekilleri gol çekdiler.
«Ähli türki dilli halklaryň medeniýetinde köpri bolmak, edebiýatyň we medeniýetiň üsti bilen doganlyk halklary ýakynlaşdyrmak TÜRKSOÝ-yň mukaddes borjudyr» - diýip, TÜRKSOÝ-yň Baş sekretary Sultan Raýew birleşmäniň dörediliş dabarasynda eden çykyşynda belledi, Ýazyjylar birleşmesiniň türk siwilizasiýasyny galkynyşyň täze tapgyryna getirjekdigine ynam bildirdi.
Täze döredilen Birleşmäniň başlyklygyna Gazagystanyň Ýazyjylar birleşmesiniň baştutany Ulugbek Esdaulet saýlandy, TÜRKSOÝ guramasyna agza-ýurtlaryň ýazyjylar birleşmesiniň prezidentleri wise-prezident edilip bellenildi.
TÜRKSOÝ-yň Ýazyjylar birleşmesiniň birinji ýygnagyny şu ýylyň mart aýynyň aýagynda Özbegistanda geçirmek meýilleşdirilýär.
ORIENT habarlar
