Türkmenistanyň Tbilisidäki ilçisi Gruziýanyň golýazmalar merkeziniň müdiri bilen duşuşdy
Türkmenistanyň Gruziýadaky adatdan daşary we doly ygtyýarly ilçisi Döwletmyrat Myradow we Gruziýanyň Korneli Kekelidze adyndaky Milli golýazmalar merkeziniň müdiri Zaal Abaşidze Türkmenistan we Gruziýa halklarynyň milli mirasynyň we medeni gymmatlyklarynyň tanadylmagyny ara alnyp maslahatlaşdlary. Duşuşyk sişenbe güni Tbilisi şäherinde geçirildi – diýip, Türkmenistanyň Daşary işler ministrliginiň saýty habar berýär.
Şeýle hem taraplar ýurtlaryň arasyndaky ikitaraplaýyn ylym we bilim hyzmatdaşlygyny has çuňlaşdyrmak we berkitmek meselelerini ara alyp maslahatlaşdylar. Türkmen diplomaty Türki döwletleriň halkara guramasynyň (TÜRKSOÝ) 2024-nji ýyly «Türk dünýäsiniň beýik şahyry we akyldary Magtymguly Pyragynyň ýyly» diýip yglan edendigini aýtdy. Ol häzirki wagtda türkmen klassiginiň 300 ýyllygyny halkara derejesinde bellemek üçin taýýarlyk görülýändigini belläp, munuň özüniň şahyryň döredijilik mirasynyň ähli adamzadyň gymmatlygynyň aýdyň subutnamasydygyny nygtady.
Zaal Abaşidze, öz gezeginde, Türkmenistanyň Ylymlar akademiýasynyň Magtymguly adyndaky milli dil, edebiýat we golýazmalar instituty bilen Gruziýanyň milli golýazmalar merkeziniň arasyndaky netijeli hyzmatdaşlygyň iki ýurduň arasyndaky medeni we ynsanperwer gatnaşyklaryň pugtalanmagyna ýardam etjekdigini belledi.
Duşuşyga gatnaşanlar, dowamly Türkmenistanda we Gruziýada halkara maslahatlary, sergileri, şeýle hem dürli medeni çäreleri geçirmegi ylalaşadylar – diýip habarda aýdylýar.
ORIENT news
