Türkmenistanyň «Deňiz söwda floty» 1-nji martdan täze arzanladyşlary yglan etdi
Türkmenistanyň «Deňiz söwda floty» JGPJ Türkmenbaşy-Baku (Alýat)-Türkmenbaşy ugry boýunça awtoulagy geçirmekde 1-nji martdan başlap boljak täze arzanladyşlary yglan etdi.
Daşamagyň nyrhy bir tarapyna arzanladyşy göz öňünde tutmak bilen, 1000 amerikan dollaryna deňdir, iki tarapyny hem töläniňde bolsa daşamagyň bahasy 1 600 ABŞ-nyň dollaryna deň bolar. Täze çäre Türkmenistanyň üstaşyr-ulag mümkinçiliklerini ösdürmäge we Hazar deňzi boýunça haryt dolanyşygynyň möçberini artdyrmaga gönükdirilendir.
Häzirki wagtda Türkmenistanyň «Deňiz söwda floty» JGPJ-nyň Ro-Pax görnüşindäki iki paromy «Bagtyýar» we «Berkarar» bar. Bu görnüşdäki paromlar uly gämi bolup durýar, olar hem ýük awtoulaglaryny, hem ýolagçylary daşamak mümkinçiligini özünde utgaşdyrýar. Geçen 2022-nji ýylda «Deňiz söwda floty» JGPJ tarapyndan 22 müň awtoulag daşaldy.
2022-nji ýylyň 7-nji noýabryndan daşary ýurt we türkmen awtoulag serişdeleriniň sürüjilerine Türkmenistanyň çäginiň üstünden giriş, çykyş we üstaşyr geçmäge rugsat berlendigini hem ýatladýarys.
Goşmaça maglumat bilen mmf.com.tm saýtynda tanşyp bolýar.
ORIENT habarlar
