Garagalpagystanda Türkmenistan bilen Özbegistanyň arasyndaky diplomatik gatnaşyklaryň 30 ýyllygyny baýram etdiler
Garagalpagystan Respublikasynyň Nukus şäherinde Türkmenistan bilen Özbegistanyň arasynda diplomatik gatnaşyklaryň ýola goýulmagynyň 30 ýyllygyna, şeýle hem Magtymguly Pyragynyň doglan gününiň 300 ýyllygyna bagyşlanan dabaraly çäre boldy. Bu barada Türkmenistanyň Özbegistandaky ilçihanasynyň metbugat üçin ýaýradan maglumatynda habar berilýär.
Çäre Garagalpagystan Respublikasynyň Ministrler Kabinetiniň başlygynyň orunbasary Rejepbaý Nurazizowyň gatnaşmagynda, Respublikanyň Ýokary geňeşiniň deputatlarynyň, ýerli ministrlikleriň we edaralaryň işgärleriniň, şeýle hem daşary döwletleriň medeniýet merkezleriniň wekilleriniň, habarçylaryň gatnaşmagynda geçdi.
Çykyş edenler türkmen-özbek gatnaşyklarynyň netijeli häsiýetini, 30 ýylyň dowamynda gazanylan oňyn netijeleri belläp geçdiler we geljekde olaryň ösmegi üçin uly mümkinçilikleriň bardygyny nygtadylar.
Myhmanlary medeni merkezler tarapyndan guralan we dürli ýurtlaryň halklarynyň taryhy, ruhy-medeni mirasy bilen tanyşdyrýan sergi garşy aldy.
Berdak adyndaky Garagalpak döwlet akademiki sazly teatry Magtymguly Pyragynyň, Alişer Nowaýynyň we Berdagyň goşgularyny öz ene dillerinde okadylar.
Çäräniň çäklerinde şeýle hem türkmen, özbek, garagalpak we beýleki dillerde aýdymlar ýaňlandy, tanslar ýerine ýetirildi.
ORIENT habarlar
