Eýranyň Mazenderan welaýaty gazagystanlylar üçin syýahatçylyk ugurlarynyň birine öwrüler
Eýranyň özboluşly we tebigy baýlyklary bolan Mazenderan welaýaty Gazagystanyň ýaşaýjylary üçin syýahatçylyk ugry bolmak mümkinçiliklerine eýedir. Bu barada ýekşenbe güni Gazagystanyň Mangistau oblastynyň häkiminiň orunbasary Kanat Kuljanow Mazenderan welaýatynyň häkiminiň orunbasary bilen ikitaraplaýyn gatnaşyklaryň ösüşi baradaky meselelere bagyşlanyp geçirilen duşuşygyň netijeleri boýunça aýtdy.
Kuljanow Mazenderan welaýatynyň ykdysady we syýahatçylyk infrastrukturasyny söwda gatnaşyklarynyň ösmegi üçin özboluşly diýip atlandyrdy. Gazagystanyň resmi wekili welaýatda lukmançylyk syýahatçylygynyň esasy ornuny hem belläp geçdi.
Onuň sözlerine görä, gazagystanly syýahatçylaryň Eýrana syýahat etmegi üçin iki ýurduň arasynda wiza düzgünini ýönekeýleşdirmek meselesi gün tertibinde dur.
Mangistau welaýatynyň häkiminiň orunbasary Eýranyň Mazandarandaky ýokary tehnologiýaly kärhanalarynyň mümkinçiliklerinden peýdalanmaga gyzyklanma bildirdi.
Eýranyň demirgazygyndaky Mazenderan welaýaty Hazar deňziniň günorta we günorta-gündogar kenarlarynda ýarym aý şekilli zolagy eýeleýär. Geografiki taýdan Mazenderan iki sebite bölünýär: kenarýaka düzlük we daglyk.
Bu ýerde ýyly we sowuk mineral çeşmeler, şeýle hem beýik şarlawuklar, syrly gowaklar, milli seýilgähler we tokaýlar, goraghanalar, binagärlik ýadygärlikleri bolan köşkler, galalar we beýleki taryhy binalar bar.
Esasy syýahatçylyk pudagynda 145 myhmanhana, şeýle hem 12,000-den gowrak hususy ýaşaýyş jaýy, hökümet tarapyndan gurlan 48 ýaşaýyş jaý toplumy, motel we 370,000-den gowrak syýahatçylyk gullugy we 120 sany kenarýaka desgalary bar. Bularyň hemmesi syýahatçylaryň rahatlygy we ajaýyp dynç almagy üçin döredilendir.
ORIENT news
