Hindistanyň Anipra Impex kompaniýasyTürkmenbaşynyň deňiz portunyň mümkinçilikleri bilen tanyşdy
Anna güni «Türkmendeňizderýaýollary» agentligi Hindistan Respublikasynyň Anipra Impex LTD kompaniýasynyň wekilleri bilen onlaýn-duşuşyk geçirdi.
Taraplar Türkmenbaşynyň Halkara deňiz portunuň infrastrukturasyny, terminallaryny we üstaşyr mümkinçiligini ara alyp maslahatlaşdylar. Şeýle hem duşuşugyň barşynda deňiz portunyň mümkinçiliklerini kämilleşdirmek boýunça hyzmatdaşlygy ýola goýmagyň meselelerine degilip geçildi.
Kompaniýanyň wekili Anipra Impex kompaniýasynyňdünýäniň we sebitiň dürli künjeklerinde geçirýän işleri barada gürrüň berdi, şeýle hem Türkmenbaşynyň halkara deňiz portunda üstaşyr ýük taslamalarynyň ýerine ýetirilmek mümkinçiliklerini belledi.
Üstaşyr arkaly Russiýa Federasiýasyndan Türkmenistanyň üsti bilen Hindistana ugradylyp bilinjek, Günbatar Ýewropa ýurtlaryndan Özbegistana ugradylyp bilinjek mümkin bolan ýükler barada maglumat berildi.
Türkmenbaşynyň halkara deňiz porty üçin ýük taslamalary boýunça maslahat beriş hyzmatlaryny bermek mümkinçiligini belläp geçmek bilen, kompaniýanyň wekili taraplaryň arasynda degişli şertnama baglaşylan halatynda goşmaça üstaşyr daşamalary ýerine ýetirip başlanyp bilinjekdigini belledi.
Duşuşygyň ahyrynda taraplar Türkmenistan bilen Hindistan Respublikasynyň arasynda ulag we logistika pudagynda halkara hyzmatdaşlygyny mundan beýläk ösdürmek üçin ähli tagallalaryň ediljekdigini nygtadylar.
ORIENT habarlar
