Türkmenistan daşky gurşaw meseleleri boýunça «ÝB-MA» maslahatyna gatnaşdy
Türkmenistanyň wekiliýeti Rimde tamamlanan daşky gurşaw we suw serişdeleri meseleleri boýunça «ÝB-Merkezi Aziýa» ýokary derejedäki 7-nji Maslahatyna gatnaşdy.
Maslahat Italiýanyň Daşary işler ministrliginiň binasynda geçdi. Gatnaşyjylar daşky gurşaw we suw serişdeleri babatynda hyzmatdaşlyk boýunça ÝB-Merkezi Aziýa platformasynyň soňky üç ýylyň dowamyndaky işleriniň netijeleri we üstünlikleri bilen tanyşdylar, şeýle hem Platformanyň çäklerinde 2023-2025-nji ýyllar üçin özara hereket etmegiň mundan beýläkki ädimlerini meýilleşdirdiler.
«Howanyň üýtgemegi bütindünýä meselesi bolup durýar, şol sebäpli hem bu meseläniň hem dünýä derejesinde, hem sebit derejesinde çözgüdini tapmak zerurdyr» - diýip, Ýewropa Birleşiginiň Merkezi Aziýa boýunça ýörite wekili Terhi Hakala aýtdy.
Maslahatyň ahyrynda Merkezi Aziýa, Ýewropa Birleşigi (ÝB) we ÝB-ne agza döwletleriň daşky gurşaw, howanyň we suw serişdeleriniň üýtgemegi babatynda syýasatyň işlenip düzülmegine jogapkär wekiliýetiniň agzalary jemleýji resminamasyny kabul etdiler.
Olar MA ýurtlary tarapyndan 2019-njy ýyldaky döwürden bäri ýetilen ösüşi makulladylar, çynlakaý meseleleri çözmek we daşky gurşawa artýan howplary çözmek üçin ÝB bilen Merkezi Aziýa ýurtlarynyň arasynda ýokary derejedäki dialogyň dowam etdirilmeginiň zerurdygyny tassykladylar.
Öz ýurtlarynyň BMG-niň durnukly ösüş babatyndaky 2030-njy ýyla çenli Gün tertibine ygrarlydygyny tassyklap, gatnaşyjylar şeýle hem serhetýaka suw hyzmatdaşlygyny işjeňleşdirmegiň zerurdygyny bellediler.
ORIENT habarlar
