GDA-nyň agza döwletleriniň XV Halkara ykdysady forumy martda Moskwada geçiriler
2023-nji ýylyň 17-nji martynda Moskwada GDA agza-döwletleriň «Integrasiýalaryň dialogy: GDA, EAES, ŞOS, BRIKS» XV halkara ykdysady forumy geçiriler.
GDA-nyň Ykdysady geňeşiniň nobatdaky mejlisi bilen birwagtda bolup geçjek çäre Arkalaşygyň ykdysady ösüşi üçin bilelikdäki kararlaryň işlenip düzülmegine we kabul edilmegine, uzak möhletleýin hyzmatdaşlygyň ýola goýulmagyna gönükdirilendir.
Forum açyk dialog üçin ykdysady ösüş, maliýe, senagat we söwda ministrlikleriniň işgärleriniň wekillerini, häkimiýet edaralarynyň, bank jemgyýetçiliginiň wekillerini, şeýle hem GDA ýurtlarynyň telekeçilerini bir meýdançada ýygnar.
Forumyň maksatnamasy tematiki bölümleri, maliýe, senagat, saglygy goraýyş, ulag, «ýaşyl ykdysadyýetiň» we ş.m. meseleleri boýunça tegelek stollary öz içine alýar. Çäräniň çäklerinde Forumyň gatnaşyjylarynyň taslamalarynyň sergisi geçirilip, onda «GDA işewürliginiň lideri» hormat belgisi bilen sylaglama dabarasy bolar.
Forum «GDA-nyň ykdysady ösüşiniň Işewürler merkezi» birleşmesi tarapyndan Arkalaşygyň ýerine ýetiriji komitetiniň goldaw bermeginde gurnalar. Goşmaça maglumat bilen Forumyň saýtynda tanşyp bilersiňiz.
ORIENT habarlar
