Türkmenistanyň Prezidenti resmi sapar bilen Bahreýn Patyşalygyna ugrady
Türkmenistanyň Prezidenti resmi sapar bilen Bahreýn Patyşalygyna ugrady
Şu gün hormatly Prezidentimiz Serdar Berdimuhamedow resmi sapar bilen Bahreýn Patyşalygyna ugrady.
Aşgabadyň Halkara howa menzilinde döwlet Baştutanymyzy resmi adamlar ugratdylar.
Iki ýarym sagatdan soň, hormatly Prezidentimiziň uçary Muharrak şäheriniň Halkara howa menziline gondy.
Uçaryň ýanynda döwlet Baştutanymyzy Bahreýn Patyşalygynyň Premýer-ministriniň orunbasary Şeýh Halid bin Abdulla Al-Halifa hem-de beýleki resmi adamlar garşyladylar.
Haly ýodasynyň ugrunda Hormat garawulynyň esgerleri nyzama düzüldi.
Howa menzilinden döwlet Baştutanymyzyň awtoulag kerweni «Four Seasons» myhmanhanasynda ýerleşen kabulhanasyna tarap ugrady.
22-nji fewralda Türkmenistanyň Prezidenti Serdar Berdimuhamedowyň Bahreýniň Patyşasy Şeýh Hamad Bin Isa Al-Halifa bilen duşuşygy bolar.
Döwlet Baştutanymyzyň bu saparynyň dostlukly ýurda ilkinji saparydygyny bellemek gerek.
Ýokary derejede geçiriljek duşuşyk söwda-ykdysady ulgamda bolşy ýaly, medeni-ynsanperwer ulgamlarda hem häzirki döwrüň anyk ýagdaýlaryny hem-de gatnaşyklaryň uly mümkinçiligini nazara alyp, özara bähbitli hyzmatdaşlygyň ileri tutulýan ugurlaryny kesgitlemäge gönükdirilendir.
Iki ýurduň hem ykdysadyýeti üçin strategik häsiýetli bolan ýangyç-energetika toplumy döwletara gatnaşyklarynyň ileri tutulýan ugurlarynyň biridir.
