Bilim Ministrligi Türkmenistanda diplomy ykrar edilýän ýokary okuw mekdepleriniň sanawyny giňeltdi
Türkmenistanyň Bilim ministrligi ýurtda diplomlary kabul edilýän ýokary okuw mekdepleriniň sanawynyň üstüni ýetirdi. Degişli üýtgetmeler «Türkmenistanda ýokary we orta hünär bilimi baradaky daşary ýurt döwletleri tarapyndan berlen resminamalaryň ykrar edilişiniň tertibine» girizilendir.
Sanawa Moskwanyň «Uniwersitetiň üç missiýasy» halkara reýtingine we QS World University Rankings reýtingine girýän ýokary okuw mekdepleri goşuldy.
2022-nji ýylda «Uniwersitetiň üç missiýasy» reýtingine 103 ýurtdan 1800 uniwersitet girdi. Reýtingiň liderleriniň arasynda – Garward, Massaçusets tehnologik instituty, Kembrij, Oksford we Londonyň uniwersitet kolleji bar.
QS World University Rankings – bütin dünýä boýunça ýokary okuw mekdepleriniň işjeňliginiň seljermesine ýöriteleşdirilen Quacquarelli Symonds britan kompaniýasy tarapyndan düzülen uniwersitetleriň her ýylda täzelenýän reýtingidir. QS reýtingi dünýädäki uniwersitetleriň iň abraýly üçden biri hökmünde seredilýär.
ORIENT habarlar
