Türkmenistan we Ermenistan medeniýet we sungat ulgamynda hyzmatdaşlyk etmek maksatnamasyna gol çekerler
Ýerewandaky türkmen ilçisi Muhammetgeldi Aýazowyň Ermenistanyň ylym, bilim, medeniýet we sport ministri Žanna Andreasýan bilen bolan duşuşygynda medeniýet we sungat ulgamynda Türkmenistan bilen Ermenistanyň hökümetleriniň arasynda hyzmatdaşlyk etmek maksatnamasynyň taslamasyna gol çekmäge taýýarlyk gozgalan meseleleriň birine öwrüldi.
Duşenbe güni 20-nji fewralda geçirilen duşuşygyň dowamynda, şeýle hem şu ýyl Türkmenistanyň Ermenistanda Medeiýet günlerini geçirmek meselesine garaldy. Ol 2019-njy ýylda Aşgabatda geçirilen Ermenistanyň Medeniýet günlerine jogapdyr.
Hususan-da, Aýazow şol günleriň çäklerinde 2024-nji ýylda 300 ýyllygy dabaraly belleniljek türkmen akyldar şahyry beýik Magtymguly Pyraga bagyşlanan maslahaty we konserti geçirmegi tekllip etdi.
Mundan başga-da, Žanna Andreasýan Türkmenistanyň türgenlerini Ermenistanyň sport toplumlarynda okuw-türgenleşik ýygnanyşyklaryny geçirmäge çagyrdy.
Şeýle hem bilelikdäki ylmy-barlag maksatnamalarynyň we taslamalaryň esasynda ylym ulgamynda hyzmatdaşlygy giňeltmäge ikitaraplaýyn taýýarlyk beýan edildi.
ORIENT news
