Türkmenistanda maýyplygy bolan ýaşlar üçin adam hukuklary boýunça Mekdebe ýazylyşyk dowam edýär
BMG-niň adam hukuklary baradaky Ýokary komissarynyň Müdirliginiň Merkezi Aziýa boýunça sebitleýin bölümi maýyplygy bolan ýaşlar üçin adam hukuklary boýunça Mekdebe ýazylyşygy yglan edýär. Bu barada BMG-niň Türkmenistandaky wekilhanasynyň Instagram-hasabynda habar berilýär.
Mekdebe 18 ýaşdan 30 ýaşa çenli maýyplygyň dürli görnüşi bolan, Aşgabat şäherinde ýa-da Ahal welaýatynyň çäginde ýaşaýan ýaşlar kabul edilýär. Ýüz tutmalar 2023-nji ýylyň 28-nji fewralyna çenli ýörite onlaýn-formany doldurmak arkaly kabul edilýär.
Mekdebiň çäklerindäki okuw 2023-nji ýylyň martyndan sentýabryna çenli Aşgabatda BMG-niň binasynda geçiriler.
Saýlap almadan geçen dalaşgärler üçin adam hukuklary, deňlige we kemsitmezlige halkara çemeleşmeler boýunça okuwlaryň tapgyry göz öňünde tutulýar, onuň dowamynda olar bilimleriň uly goruna eýe bolarlar we tejribe başarnyklaryny edinerler.
Goşmaça maglumatlary bilmek üçin elektron salgy: yelena.butova@un.org.
ORIENT habarlar
