Eýran Türkmenistanda nebiti gaýtadan işleýän zawodlary gurmak isleýandigini beýan etdi
Eýran Türkmenistanda nebiti gaýtadan işleýän zawodlary gurmaga, nebit we gaz ýataklaryny bilelikde özleşdirmäge, şeýle hem bäsdeşlige ukyply ýokary hilli enjamlary elýeterli bahadan Türkmenistana ibermäge taýýardyr.
Bu barada Eýranyň nebit ministriniň inženerçilik, barlaglar we tehnologiýalar meseleleri boýunça orunbasary Wahidreza Zeýdifard EYR-nyň nebit-gaz pudagynyň wekilleriniň «Türkmengaz», «Türkmennebit» we «Türkmenhimiýa» döwlet konsernleriniň wekilleri bilen duşuşygynda eýran harytlarynyň Aşgabatdaky sergisisiniň barşynda beýan etdi. Bu barada mehrnews.com. neşiri habar berýär.
Ol Eýranyň nebit-gaz pudagynda ulanylýan tehnologiýalaryň 70%-den gowragynyň ýurduň özünde öndürilýändigini, şol sebäpli Eýranyň öz öndüren enjamlaryny Türkmenistana iberip biljekdigini beýan etdi.
Eýranyň nebit ministriniň orunbasary türkmen hünärmenlerini EYR-nyň nebit senagatynyň mümkinçilikleri bilen tanyş bolmak üçin bu ýurda gelip görmäge çagyrdy. Duşuşygyň netijeleri boýunça nebit-gaz edaralarynyň wekilleri türkmen tarapynyň öz kärdeşlerine gerekli enjamlaryň sanawyny diplomatik ýollar arkaly ibermek barada ylalaşdylar.
ORIENT habarlar
