Ahal welaýatynda iki sany täze orta hünär okuw mekdebi peýda bolar
Ahal welaýatynda ýene iki sany tehniki orta hünär okuw mekdebi – Saçly Dursunowa adyndaky Lukmançylyk orta hünär okuw mekdebi we Berdimuhamet Annaýew adyndaky orta hünär okuw mekdebi dalaşgärler üçin gapylaryny giňden açar. Welaýatda bu bilim edaralarynyň döredilmegi bilen baglanyşykly resminamalara Prezident Serdar Berdimuhamedow anna güni Ministrler Kkabinetiniň mejlisinde gol çekdi – diýlip, resmi türkmen metbugaty habar berýär.
Döwlet baştutany Bilim ministrligine 2023-2024-nji okuw ýylyndan talyplary kabul edip başlajak we Türkmenistanyň bilim ulgamyndaky edaralaryň sanawynyň üstüni ýetirjek bilim edaralarynyň tertipnamasyny taýýarlamagy we bellenilen tertipde tassyklamagy tabşyrdy.
Mälim bolşy ýaly, orta hünär okuw mekdepleri hünärmenleriň taýýarlanýan bilim ojagydyr. Mysal üçin, häzirki wagtda ýurduň welaýatlarynda lukmançylyk pudagy üçin saglygy goraýyş edaralarynyň geljekki işgärleriniň taýýarlanýan lukmançylyk orta okuw mekdepleri hereket edýär.
Şeýle-de, ýaşlaryň arasynda mugallymçylyk orta okuw mekdepleri hem uly meşhurlyga eýedir. Bu bilim edaralarynyň uçurymlary çagalar baglary, mekdebe çenli çagalar edaralary we umumy bilim mekdepleriniň başlangyç synplary üçin hünärmenleridir. Häzirki wagtda ýurtda 3 sany pedagogiki mekdep bar, olar Aşgabat şäherinde, Mary we Daşoguz welaýatlarynda ýerleşýär.
ORIENT news
