Türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedowyň BAE resmi sapary
Türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedowyň BAE resmi sapary
11-nji fewralda türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedow Birleşen Arap Emirliklerine resmi sapara ugramak üçin paýtagtymyzyň halkara howa menziline geldi. Howa menzilinde Gahryman Arkadagymyz BAE-niň Türkmenistandaky ilçihanasynyň wekili bilen söhbetdeş boldy. Hormatly Arkadagymyz BAE-niň ýurdumyzdaky ilçihanasynyň wekiline bu resmi saparyň iki ýurduň arasyndaky däp bolan dostlukly gatnaşyklaryň mundan beýläk-de pugtalandyrylmagyna ýardam berjekdigini belledi.
Abu-Dabi şäheriniň Halkara howa menzilinde türkmen halkynyň Milli Lideri, Türkmenistanyň Halk Maslahatynyň Başlygy Gurbanguly Berdimuhamedowy BAE-niň Adalat ministri Abdullah bin Sultan bin Awad Al Nuaimi hem-de beýleki resmi adamlar mähirli garşyladylar. Howa menzilinde Gahryman Arkadagymyz BAE-niň Adalat ministri bilen söhbetdeş boldy. Söhbetdeşligiň barşynda mähriban Arkadagymyz Türkmenistanyň Birleşen Arap Emirlikleri bilen özara bähbitli we netijeli hyzmatdaşlygyň ösdürilmegine möhüm ähmiýet berýändigini belledi. Şunuň bilen baglylylykda, hormatly Prezidentimiz Serdar Berdimuhamedowyň türkmen-emirlik hyzmatdaşlyk gatnaşyklaryny hil taýdan täze derejä çykarmakda tagallalary aýratyn bellenildi.
BAE-ne saparynyň barşynda Türkmen halkynyň Milli Lideri, Abu-Dabi şäherinde ýerleşýän “Şeýh Zaýed” metjidine baryp gördi. Bu ýerde Hajy Arkadagymyzy metjidiň dolandyryş merkeziniň baş müdiri Ýusef Al Obaidli mähirli garşylady. Merhum Prezident Şeýh Zaýed bin Sultan Al Nahaýýanyň aramgähine zyýarat edilenden soňra Gahryman Arkadagymyz metjidiň aýratynlyklary bilen tanyşdyryldy. BAE-niň esaslandyryjysy we ilkinji Prezidenti Şeýh Zaýed bin Sultan Al Nahaýýanyň adyny göterýän bu metjit dünýäniň iň uly 6 metjidiniň biri hasaplanylýar.
Gahryman Arkadagymyz dostlukly ýurda saparynyň çäklerinde BAE-niň esaslandyryjysy we ilkinji Prezidenti Şeýh Zaýed bin Sultan Al Nahaýýanyň adyny göterýän metjide gelendigini aýdyp, bu metjidiň dünýäniň iň uly metjirleriniň biridigini belledi. Hormatly Arkadagymyz metjit –Allanyň öýi diýip hasaplanýandygyny aýdyp, bu ýerde öten –geçenleri sarpalamak iki dostlukly ýurduň halklarynyň asylly däbidigini belledi. BAE-niň esaslandyryjysy we ilkinji Prezidenti Şeýh Zaýed bin Sultan Al Nahaýýan bilen bir saçagyň başynda oturmagyň miýesser edendigini atýmak bilen, Gahryman Arkadagymyz onuň Türkmenistanda hemişe ýagşylykda ýatlanýandygyny aýtdy.
