BMGÖM zorlukly ekstremizmiň öňüni almagyň güni mynasybetli seminar geçirdi
12-nji fewralda bellenip geçilýän zorlukly ekstremizmiň öňüni almaklygyň Halkara güni mynasybetli BMGÖM tarapyndan Halkaraynsanperwer ylymlary we ösüş uniwersitetinde ZEÖA-ga jemgyýetler derejesinde psihologiki goldawy bermek arkaly ýaşlaryň durnuklylygyny pugtalandyrmak boýunça seminar geçirdi. Bu barada guramanyň metbugat beýanatynda habar berilýär.
Çäre ýokary okuw mekdebiniň mugallymlar düzüminiň zorlukly ekstremizmiň öňüni almak babatyndaky mümkinçiliklerini kämilleşdirmäge niýetlenendir. Ol durmuş ulgamynyň işgärleriniň ýaşlara sosial-psihologiki hyzmatlary bermekde eýeleýän ornuny, stresi dolandyrma usulyny we ruhy saglygy saklamagyň usullaryny ara alyp maslahatlaşmak üçin platforma boldy.
Seminar «Aziýada zorlukly ekstremizme garşy durnuklylygy güýçlendirmek (STRIVE Asia) ÝB-niň we BMG-niň bilelikdäki hyzmatdaşlygy» bütindünýä taslamasynyň Ýurt bölüminiň çäklerinde gurnaldy. Ol şu taslamanyň çäklerinde döredilen Aşgabat konsutatiw toparynyň gatnaşmagynda Ýewropa Bileleşigi tarapyndan maliýeleşdirilýär.
Zorlukly ekstremizm Birleşen Milletler Guramasynyň maksatlaryna we ýörelgelerine garşylyklaýyn duran meseledir. Özüniň 77/243-nji rezolýusiýasynda Baş Assambleýa zorlukly ekstremizm bilen baglanyşykly howplardan habardar bolmagyň ýokarlandyrylmak we bu babatda halkara hyzmatdaşlygyny pugtalandyrylmak maksady bilen, 12-nji fewraly Zorlukly ekstremizmiň halkara güni diýip yglan etmekbarada karar kabul edipdi.
Baş Assambleýa şeýle hem bu meseläni çözmekde hökümetara guramalaryň, raýat jemgyýetçiliginiň, ylmy toparlaryň we köpçülikleýin habar beriş serişdeleriniň möhüm rol oýnaýandygyny belledi. Hiç bir ýurt ýa-da sebit onuň täsirlerinden ätiýaçlandyrylan däldir.
ORIENT habarlar
