Türkmen ilçisi COMSTECH-iň baş utgaşdyryjysy bilen ynsanperwer hyzmatdaşlygyň ösdürilmegini maslahatlaşdy
Türkmen ilçisi Atajan Möwlamow we Yslam hyzmatdaşlygy guramasynyň ylmy-tehniki hyzmatdaşlyk boýunça ministrler derejesindäki hemişelik komitetiň (COMSTECH) baş utgaşdyryjysy Muhammad Çoudari ylym, bilim we medeniýet ulgamlarynda Türkmenistan bilen Pakistanyň arasyndaky hyzmatdaşlygy giňeltmegiň mümkinçiligini ara alyp maslahatlaşdylar. Duşuşyk COMSTECH-iň Sekretariatynda geçirildi diýlip, türkmen DIM-niň saýtynda ýerleşdirilen habarda aýdylýar.
COMSTECH-iň Sekretariaty YHG-ne agza döwletleriň ylmy-tehniki ösüşine ýardam etmäge taýýar bolan ylmy barlaglary alyp baryjylar, inženerler, hünärmenler we alymlar üçin Yslam hyzmatdaşlygy guramasynyň iň ýaş agzasydyr.
Taraplar Türkmenistanyň we Pakistanyň ýokary okuw mekdepleriniň arasynda ylym-bilim gatnaşyklaryny ösdürmegi, şeýle hem bu ulgamda yzygiderli bilelikdäki çäreleri geçirmegi ylalaşdylar.
Duşuşugyň dowamynda türkmen diplomaty “akylly şäher” konsepsiýasy esasynda gurlan Ahal welaýatynyň täze, döwrebap dolandyryş merkezi – täze Arkadag şäheri barada gürrüň berdi. Pakistan tarapy bu baradaky maglumaty diňläp, türkmen şähergurluşyk taslamasyna ýokary baha berdi.
ORIENT news
