Pakistan Türkmenistan bilen sebitleýin gatnaşyklary giňeltmäge gyzyklanýar
Pakistanyň parlamentiniň aşaky palatasynyň baştutany Radja Perwez Aşraf türkmen ilçisi Atajan Möwlamow bilen duşuşykda howa, gury ýer we suw arkaly sebitleýin gatnaşyklary giňeltmek üçin tagallalary birleşdirmegi teklip etdi – diýip, Daily Times habar berýär.
Radja Perwez Aşraf Türkmenistan bilen Pakistanyň arasyndaky özara gatnaşyklaryň öndürijilikli häsiýetini belläp geçdi. Ol Pakistanyň Merkezi Aziýa ýurtlaryna görä, hyzmatdaşlygyň bäş sany esasy ugurlaryny – syýasy, söwda we maýa goýum, energetika we aragatnaşyk, howpsuzlyk we hünärmenleri alyş-çalyş etmek ýaly ugurlaryny ýatladyp, netijelere gönükdirilen özara täsiriň syýasatyna daýanýandygyny nygtady.
Şeýle hem aşaky palatanyň baştutany ikitaraplaýyn gatnaşyklar barada aýtmak bilen, Türkmenistana Pakistanyň Gwadar, Bin-Kasim we Karaçi portlaryny Ýakyn Gündogar we Afrika bilen söwda etmekde ulanmaklygy teklip etdi.
Türkmenistanyň Pakistandaky diplomatik wekilhanasy ikitaraplaýyn hyzmatdaşlygyň pugtalandyrylmagyna taýýardygyny bildirdi, şeýle hem 2022-nji ýylyň sentýabr aýynda Pakistanyň günorta welaýatlaryny sil alanda berlen ynsanperwer kömegi üçin ýene-de bir gezek dostlukly ýurtdan minnetdarlyk sözlerini kabul etdi.
ORIENT habarlar
