FAO Türkmenistanda milli tokaý maksatnamasynyň durmuşa geçirilmegine ýardam edýär
BMG-niň Azyk we oba hojalyk guramasy (FAO) Türkmenistanda Milli tokaý maksatnamasyny durmuşa geçirmek boýunça iki sany nahalhana we görkeziliş meýdançasyny döretdi – diýip, guramanyň metbugat üçin maglumatynda habar berilýär.
Her biriniň meýdany 1 ga deň bolan nahalhanalar Bäherden we Daşoguz tokaý hojalyklarynyň önümçilik meýdançalarynda döredildi, meýdany 3 ga deň bolan görkeziliş meýdançasy bolsa – S. A. Nyýazow adyndaky Türkmen oba hojalyk uniwersitetiniň okuw hojalygynyň esasynda döredildi.
Nahalhanalarda oturdylýan materialyň dürli görnüşleri: miweli, ýaprakly baglaryň, pürli agaçlaryň nahallary we tohumdan gögerenleri, çöl ösümlikleriniň, gyrymsy agaçlaryň we ýarym gyrymsy agaçlaryň nahallary ösdürilip ýetişdiriler, görkeziliş meýdançasy bolsa şor ýerlere we gurakçylyga çydamly ösümlikleri ösdürip ýetişdirmegiň döwrebap usullaryny ulanyp, ikilenç şorlaşmanyň derejesini peseltmek üçin dürli agromelioratiw çäreler üçin niýetlenendir.
Suw serişdelerini tygşytly dolandyrmak üçin nahalhanalarda we görkeziliş meýdançasynda suw üçin uly sygymlyklary bolan damja usulynda suwaryş ulgamy oturdylandyr.
Türkmenistanyň Oba hojalygy we daşky gurşawy goramak ministrligi bagçylyk hojalygynyň çäklerini giňeltmek üçin miweli-iýmişli ösümlikleriň 25 müň nahalyny satyn aldy. Hususan-da, şor ýerlere we gurakçylyga çydamly miweli ekinleriň (beýi, igde, unabi), şeýle hem şorlaşmanyň derejesini peseltmäge we ýeriň hasyllylygyny ýokarlandyrmaga mümkinçilik berýän beýleki ösümlikleri (saflora, kinoa, ýorunja, arpa we ş.m.) ösdürip ýetişdirmek meýilleşdirilýär.
TOHU-niň görkeziliş meýdançasynda agronomiki gözegçilik meselelerini çözmek we topragyň hasyllylygyny ýokarlandyrmak üçin topragyň ekspress-seljermesini geçirmek üçin häzirki zaman meýdan enjamyny ulanyp, ylmy işleri gurnamak meýilleşdirilýär. Şeýle hem bu ýerde tejribe meýdan okuw sapaklaryny geçirmek meýilleşdirilýär.
Bu başlangyç FAO-nyň we Bütindünýä ekologiki gaznasynyň «Merkezi Aziýanyň we Türkiýäniň gurakçylyga we şorlaşmaga duýgur oba hojalyk önümçilik landşaftlarynda tebigy serişdeleri toplumlaýyn dolandyrmak» taslamasynyň (ИСЦАУЗР-2) çäklerinde amala aşyryldy.
ORIENT habarlar
