Azerbaýjan we Rumyniýa täze gaz şertnamasyna gol çekdiler
Rumyniýanyň Romgaz S.A. döwlet kompaniýasy we Azerbaýjanyň Socar nebit-gaz kompaniýasy Azerbaýjandan Rumyniýa tebigy gazy ibermek baradaky täze şertnama gol çekdiler. Bu barada SOCAR maglumatlar gullugy habar berýär.
Azerbaýjan eýýäm ýanwar aýynda tebigy gazyň ilkinji tapgyryny Rumyniýa iberdi. Täze şertnama 2023-nji ýylyň aprelinden başlap hereket eder we üpjün etmeleriň mehanizmini kämilleşdirer.
Döwletler birnäçe energetika taslamalarynyň üstünde işlemekligi dowam etdirerler, olaryň arasynda Aziýanyň we Ýewropanyň ýurtlaryny birikdirýän Günorta gaz geçelgesi aýratyn orun eýeleýär.
Geljekde Azerbaýjanyň Ýewropa tarapa ibermek üçin beýleki ýurtlardan, şol sanda Türkmenistandan hem gaz satyn almagyna garaşylýar. Köp bilermenleriň pikirine görä, hut Türkmenistanyň mawy ýangyjy ibermegini artdyrmaga we Ýewropanyň energetika howpsuzlygyny üpjün etmäge ýeterlik mümkinçiligi bardyr.
ORIENT habarlar
