Gazagystanyň prezidenti Astananyň täze baş meýilnamasyny döretmekligi tabşyrdy
Astanany ösdürmek boýunça geçirilen ýygnakda Gazagystanyň prezidenti Kasym-Žomart Tokaýew şäheriň täze baş meýilnamasyny işläp düzmekligi tabşyrdy – diýip, Tengrinews habar berýär.
Meýilnama laýyklykda paýtagt ösüşiň täze modelini kabul etmek bilen, geljegiň innowasion şäheri bolmalydyr.
«Dünýäde şäheri dolandyrmagyň täze sanly çemeleşmeleri depginli girizilýär, biz hem muňa üns bermelidiris» - diýip, Tokaýew nygtamak bilen, şäheri döredijilikli, rahat we arassa şäher ýörelgesi boýunça döwrebaplaşdyrmagyň zerurdygyny belläp geçdi.
Şunuň bilen baglylykda prezident häkimlige Sanly ösüş ministrligi bilen bilelikde IT pudagyndaky işewürligiň wekillerini we bu ugurdaky hünärmenleri işe çekip, haýal etmän işe girişmegi tabşyrdy.
Ol şeýle hem G42 arap kompaniýasynyň «Akylly şäher» taslamasynyň çäklerinde öz gazananlaryny paýlaşmaga taýýardygyny belledi.
ORIENT news
