Aşgabatda meşhur brodweý mýuzikllerinden eserler ýaňlanar
10 günlük medeniýet maksatnamasynyň çäklerinde ABŞ-dan artistler Keýt Bass we Aaron Ýang Aşgabadyň sahnasynda çykyş ederler – diýip, ABŞ-nyň Türkmenistandaky ilçihanasynyň ýaýradan maglumatynda habar berilýär.
Olar tomaşaçylary wakalygy we ýatda galýan sazy bilen özüne çekýän meşhur brodweý mýuzikllerinden eserleri ýerine ýetirerler. Mýuzikller Brodweýiň özboluşly nyşany bolup, olaryň afişalary - Manhetteniň köçeleriniň hökmany alamatlarynyň birine öwrüldi.
Konsert 10-njy fewralda Türkmenistanyň Döwlet medeniýet merkeziniň Mukamlar köşgünde geçiriler. Başlanýan wagty 18:00. Giriş tölegsiz.
Saparyň çäklerinde artistler şeýle hem Türkmenistanyň Döwlet simfoniki orkestriniň sazandalary bilen tejribe alşarlar, Maýa Kulyýewa adyndaky Türkmen milli konserwatoriýasynyň talyplary we ýurduň Döwlet horunyň wokalçylary üçin ussatlyk sapaklaryny geçirerler.
ORIENT habarlar
