Özbegistanyň we Gyrgyzystanyň raýatlary biri-birleriniňkä içerki resminamalary boýunça syýahat edip bilerler
Özbegistan bilen Gyrgyzystanyň hökümetleri iki ýurduň raýatlarynyň içerki resminamalar boýunça biri-birine syýahat etmegine mümkinçilik berýän özara saparlar baradaky ylalaşyga üýtgetme girizdiler – diýlip, UzA Milli habarlar agentligi anna güni habar berdi.
Habarlar agentliginiň berýän maglumatlaryna görä, 26-27-nji ýanwarda Özbegistanyň prezidenti Şawkat Mirziýoýewiň Gyrgyzystana amala aşyran döwlet saparynyň dowamynda iki ýurduň hökümetleri tarapyndan 2006-njy ýylyň 3-nji oktýabryndaky raýatlaryň özara saparlary baradaky ylalaşyga üýtgetme girizmek baradaky teswirnama gol çekildi.
Hasabatda: "Teswirnama laýyklykda, indi Özbegistanyň ähli raýatlary Gyrgyzystana, şeýle hem Gyrgyzystanyň raýatlary Özbegistana şahsyýetnama boýunça girip bilerler" diýilýär.
Häzirki wagtda ýurtlaryň arasynda wizasyz düzgün hereket edýär, ýöne serhetden diňe daşary ýurt pasporty bilen geçip bolýar.
Täze üýtgetme serhetden islendik ulag bilen geçmegi göz öňünde tutýar we iki ýurtda-da kanunnama tassyklanandan soň, bir-iki aýyň içinde güýje girip biler – diýip, UzA sözüniň üstüni ýetirýär.
ORIENT news
