Oguzhan adyndaky uniwersitetiň olimpiadasyna gatnaşmak üçin 30 müňe golaý ýüz tutma tabşyryldy
Oguzhan adyndaky inžener-tehnologiýalar uniwersiteti tarapyndan orta mekdepleriň okuwçylarynyň arasynda geçirilýän Oguz hanyň zehinli nesilleri olimpiadasy ösüp gelýän nesliň arasynda uly gyzyklanma döretdi.
Olimpiadanyň birinji tapgyryna gatnaşmak üçin 30 müňe golaý okuwçy ýüz tutdy, bu bolsa gurnaýjylaryň garaşanyndan örän köp boldy. Ýüz tutmalaryň köp bölegi iňlis dili, tebigy we anyk ylymlar boýunça respublikan we halkara olimpiadalaryň ýeňijileri tarapyndan tabşyryldy. Hususan-da, FISO-2022, STEMCO-2022, WICE Malaýziýa ýaly halkara intellektual bäsleşikleriň ýeňijileri tabşyrdylar.
Häzirki wagtda ýokary okuw jaýynyň mugallymlary olimpiadany ýokary derejede geçirmek üçin işjeň taýýarlyk görýärler. Bäsleşik hakda we oňa gatnaşmagyň şertleri barada jikme-jik maglumatlar bilen uniwersitetiň resmi saýtynda tanşyp bolýar.
ORIENT habarlar
