Pariždäki Olimpiadany gurnaýjylar biletleriň haýyr-sahabat satuwyna başladylar
Pariždäki Tomusky Olimpiýa oýunlary 2024 ýaryşlaryna girmäge maddy mümkinçiligi bolmadyk maşgalalary goldamak başlangyjyna badalga berildi.
Kampaniýa bilet satyn alyjylary gurby çatmaýan maşgalalaryň agzalaryna Olimpiýa we Paralimpiýa oýunlaryna biletleri satyn almak üçin 2 ýewrony bagyş etmeklige çagyrýar. Serişdeler şeýle hem Oýunlaryň çäklerinde dürli gezelençleri gurnamak üçin ulanylar.
«Telekeçi Aleksandr Mars we Secours Populaire guramasy bilen hyzmatdaşlykda döreden biletleri satmagyň bu haýyr-sahabat shemamyz Oýunlary hemmeler üçin giňden açyk görnüşde geçirmegimize kömek eder, ol hem ýaryşlaryň şygary bilen gabat gelýär» – diýip, Parižde Olimpiada—2024 geçirmek boýunça Guramaçylyk komitetiniň baştutany Toni Estange aýtdy.
2024-nji ýylyň Olimpiýa oýunlary üçin biletleriň satuwy dowam edýär – bahasy 24 ýewrodan başlaýan 10 million bilet bar. Paralimpia ýaryşlaryna biletler şu ýylyň ahyrynda satuwa çykarylar.
ORIENT habarlar
