FlyDubai Aşgabada gaýtadan uçup başlady
FlyDubai awiakompaniýasy Dubaý-Aşgabat-Dubaý ugry boýunça koronawirus pandemiýasy sebäpli Türkmenistana uçuşlary ýatyrandan üç ýyla golaý wagtdan soň ilkinji ýolagçy uçuşyny amala aşyrdy.
Awiakompaniýanyň uçary Dubaýdan 23-nji ýanwarda 23:55-de uçdy we 24-nji ýanwarda 03:25-de Aşgabadyň halkara howa menziline gondy. Türkmen paýtagtyndan yzyna ol 04:35-de uçdy we Dubaýyň Halkara howa menziline 06:30-da gondy.
Şu ýokarda görkezilen tertip boýunça kompaniýa her hepdäniň duşenbe we penşenbe günleri Aşgabat ugry boýunça uçýar we her hepdäniň sişenbe we anna günleri türkmen paýtagtyndan Dubaýa uçar gatnawyny amala aşyrýar.
FlyDubai-ň resmi saýtynda Aşgabat-Dubaý ugry boýunça ekonom klasyň biletiniň bahasy $328,40 deňdir, gaýdyş ugrunyň bileti bolsa $331,90 barabardyr (2023-nji ýylyň 24-nji ýanwary ýagdaýynyň bahalary).
Aşgabatda bileti awiakompaniýanyň şu salgyda ýerleşýän ofisinden satyn alyp bolýar: Seýitnazar Seýdi köçesi, jaý 19/1 (Atamyrat alleýasy). Goşmaça maglumatlary şu telefon belgisine jaň edip, alyp bolýar: 92-01-66
ORIENT habarlar
