Astrahan oblasty we Türkmenistan hünärleriň Hazar reýestrini döredip biler
Türkmenistan we Astrahan oblasty Hazar hünär derejesiniň reýestrini döretmeklige gatnaşyp bilerler, ol ýerli iş berijileriň ýörite okuw mekdepleri üçin hünär bilim maksatnamalaryny işläp düzmäge gatnaşmaklaryny göz öňünde tutýar. Öz gezeginde, talyplar hem Türkmenistanda, şeýle hem Astrahanda hereket edýän kärhanalarda degişli başarnyklary ednip bilerler.
Degişli taslamany Türkmenistandan bolan kärdeşlerine Astrahan oblastynyň Bilim we ylym ministri Ýegor Ugarow türkmen-russiýa hyzmatdaşlygynda bilim ugrundan bolan tegelek stolda çykyş etmek bilen, teklip etdi. Bu duşuşyk Aşgabatdaky Türkmen-rus biznes-forumynyň çäklerinde geçdi – diýip, «Astrahan 24» habar berýär.
Ministriň nygtamagyna görä, türkmenistanlylar Russiýanyň Astrahan oblastynyň kärhanalarynda tejribe geçmäge we işe ýerleşmäge mümkinçilik alarlar. Isleg bildirilýän işjeňligiň ugurlary hökmünde Ugarow oba hojalygyny, gämi gurluşygyny, bilim ugruny, lukmançylygy we döredijilik pudagyny agzap geçdi.
Bilim babatynda ösüşiň geljegini ikitaraplaýyn gatnaşyklar bilen Astrahanyň Döwlet lukmançylyk uniwersitetiniň rektory Olga Başkina paýlaşdy. Ol ýokary okuw mekdepleri we ylmy-barlag merkezleri bilen, şol sanda «Aptek şäheri» maksatnamasy boýunça ylmy-barlag işjeňliginiň ugurlaryny giňeltmekligiň gerekdigini belledi.
Häzirki wagtda Astrahannyň lukmançylyk uniwersitetinde Türkmenistandan 180 talyp, ordinator we aspirant okaýarlar.
W.N. Tatişew adyndaky Astrahanyň Döwlet uniwersitetiniň halkara işleri boýunça prorektory Angelina Fadina türkmen talyplaryny häzirki zaman dünýä bazarynyň isleglerine jogap berýän ugurlary boýunça kabul etmäge taýýardygyny nygtady. Hususan-da, Türkmenistan üçin balyk hojalygy, oba hojalygy, nebitgaz pudagy we MT-y ugrundan hünärmenleri taýýarlamak boýunça bilim maksatnamalary teklip edilýär.
ORIENT habarlar
