Türkmenistanyň ýokary okuw jaýlarynda Bitaraplyk güni mynasybetli halkara internet olimpiadalary geçirildi
Wise-premýer Nurmuhammet Amannepesow Halkara Bitaraplyk güni mynasybetli geçiriljek halkara internet olimpiadalaryna taýýarlyk işleri barada hasabat berdi. Bu barada TDH agentligi Türkmenistanyň Ministrler Kabinetiniň mejlisinden soň habar berdi.
«Türkmenistanda sanly bilim ulgamyny ösdürmegiň Konsepsiýasynyň» hem-de «Türkmenistanda tebigy we takyk ylmy ugurlara degişli dersleri okatmagy kämilleşdirmegiň Konsepsiýasynyň» çäklerinde 5 — 7-nji dekabrda Myrat Garryýew adyndaky Türkmenistanyň Döwlet lukmançylyk uniwersitetinde biologiýa dersi boýunça halkara internet olimpiadasynyň geçirilmegine garaşylýar.
5-nji dekabrda bolsa S.A.Nyýazow adyndaky Türkmen oba hojalyk uniwersitetinde ekologiýa dersi boýunça açyk halkara internet olimpiadasy geçiriler.
Halkara ders olimpiadalaryna Russiýanyň, Germaniýanyň, Hytaýyň, Rumyniýanyň, Wengriýanyň, Ýaponiýanyň, Azerbaýjanyň, Belarusuň, Özbegistanyň, Gazagystanyň we beýleki köp sanly döwletleriň ýokary okuw mekdepleriniň talyplarynyň gatnaşmagyna garaşylýar.
Türkmenistanyň Prezidenti Serdar Berdimuhamedow giň halkara hyzmatdaşlygy ýola goýmagyň we dünýäniň öňdebaryjy ýokary okuw mekdepleri bilen göni aragatnaşykda bolmagyň, şeýle hem zehinli türkmen ýaşlaryny ýüze çykarmakda şeýle bäsleşikleriň geçirmegiň möhümdigi barada nygtady.
ORIENT news
Surat: sng.today
