Astrahan oblastynyň wekiliýeti Aşgabatda türkmen-rus işewürlik forumyna gatnaşar
Bu barada Astrahan oblastynyň daşary aragatnaşyklar ministri Wladimir Golowkow Astrahandaky türkmen kosuly Nury Gölliýew bilen iş duşuşygynyň barşynda habar berdi.
“Geljek hepdede Aşgabatda geçiriljek türkem-rus işewürlik forumynda dürli pudaklarda özara gatnaşyklarymyza degişli möhüm meseleler ara alnyp maslahatlaşylar, forumň işine biziň sebitimiziň wekiliýeti gatnaşar” diýip, rus ministri habar berdi. Öz nobatynda, Türkmenistanyň konsuly bu möhüm halkara çärä taýýarlyk görmäge zerur bolan ýardamlary berjekdigini aýtdy diýip, Astrahan oblastynyň Daşary aragatnaşyklar ministrliginiň resmi saýtynda ýerleşdirilen habarda aýdylýar.
Täze 2023-nji ýyl bilelikdäki möhüm taslamalary durmuşa geçirmegiň nyşany astynda geçer, şol taslamalary hatarynda “Demirgazyk-Günorta” halkara ulag geçelgesiniň işini işjeňleşdirmek, Astrahan oblastynyň hem-de Türkmenbaşy şäheriniň deňiz portlarynyň arasynda yzygiderli gämi gatnawyny ýol goýmak, şeýle hem Astrahan oblastynda Türkmenistanyň logistika merkezini gurmak taslamalary bar diýlip, duşuşykda bellenildi.
Aşgabat işewürlik forumynyň öňüsyrasynda geljek hepdede Astrahanda Russiýanyň ulag ministrliginiň we RF-niň gämi gatnawlary bilen meşgullanýan kompaniýalarynyň wekilleriniň türkmen wekiliýeti bilen duşuşygy geçiriler. Türkmen tarapynyň düzüminde Türkmenistanyň Ministrler Kabinetiniň ýanyndaky Ulag we kommunikasiýalar agentliginiň ýolbaşçylary hem-de gämi gatnawlary we logistika bilen meşgullanýan türkmen kompaniýalarynyň wekilleri bolar. Şeýle hem Hazarda Türkmenistan bilen Russiýanyň arasynda yzygiderli gämi gatnawlaryny açmagyň geljegini ara alyp maslahatlaşmak meýilleşdirilýär diýlip, habarda aýdylýar.
ORIENT news
