Ahal welaýatynda tropiki bananlar ösdürilip başlandy
Türkmenistanda ekzotiki bananlar uýgunlaşdyryldy. Indi olary bu ýerde diňe bir hojalyk ösdürip ýetişdirmeýär. “Hemsaýa” kärhanasy Ahal welaýatynda banan ýetişdirmek üçin ekerançylygy ýaýbaňlandyrdy – 5 gektar meýdany eýeleýän hojalykda ýyladyşhanada tropiki miwe ösdürilip ýetişdirilýär diýip, “Rysgal” neşiri habar berýär.
Ýyladyşhana toplumynda ýylylygy halaýan ösümligiň üstünlikli uýgunlaşmagy üçin zerur bolan oňaýly howa şertleri döredildi. Bu ýerde tempraturany awtomatiki ýagdýda dolandyrmak hem-de howanyň çyglylygy üçin döwrebap enjamlar oturdyldy, obahojalyk ekinini suwarmak üçin bolsa suw tygşytlaýjy usullar ulanylýar.
Hojalykda bananyň “Kawendiş” sorty ösdürilip ýetişdirilýär. Oturdylan baglar sekiz-dokuz aýdan soň miwe berip başlaýar, her ösümlikde bir salkym bolup, şonda takmynan 250-300 banan bolýar. Kärhana her ýyl 100 tonna golaý hasyl ýygnap almagy maksat edinýär.
Banan türkmen topragynda ilkinji gezek Mary welaýatynda ösdürilip ýetişdirilip başlandy. Şol ýerde banan ýetişdirmek bilen “Ferhar” hususy kärhana meşgullanýar. Häzir banan ýetişdirýän bu hojalykda ýene-de bir tropiki miwe bolan – papaýýa ösüp ýetişýär.
ORIENT news
