Gadymy hytaý siwilizasiýasy “Parahatçylygyň ýaş çaparlary” atly täze oýnuň temasy bolar
Sişenbe güni, 10-njy ýanwarda ýokary synp okuwçylary üçin “Parahatçylygyň ýaş çaparlary” atly akyl-paýhas oýnuna badalga berler. Okuwçylar “Gadymy hytaý siwilizasiýasy: gadymy medeniýetiň birleşdiriji güýji” diýen temada bilimleri boýunça bäsleşerler.
Munuň özi 2022-2023-nji okuw ýylynyň 2-nji möwsüminiň ikinji oýny bolar. Türkmenistanyň DIM-niň Halkara gatnaşyklary institutynyň Ýaş diplomatlar mekdebi bäsleşigi geçirmek başlangyjy bilen çykyş edýär we onuň guramaçysydyr hem-de bäsleşik 2021-nji ýyldan bäri her ýyl geçirilýär.
Okuwçylar Türkmenistanyň DIM-niň HGI-niň saýtynda akyl-paýhas bäsleşigine taýýarlyk görüp hem-de tema boýunça bilimlerini barlap görüp bilerler.
Möwsümiň ilkinji oýnunyň 2022-nji ýylyň noýabrynda geçirilendigini we “Gadymy Marguşdan Parfiýa çenli: parahatçylyk sungatynyň ösen ýörelgeleri” diýen tema bagyşlanandygyny ýatlamak ýerlikli bolar.
ORIENT news
