Özbegistanyň howa menzillerinde syýahatçylar üçin Tax Free ulgamy işe girizildi
Özbegistanyň bäş howa menzilinde - Daşkent, Samarkand, Buhara, Fergana we Ürgenç şäherlerinde 2-nji ýanwarda Tax Free ulgamy dabaraly ýagdaýda işe girizildi, onuň üsti bilen daşary ýurtly syýahatçylar satyn alan harytlary üçin keşbek alyp bilerler, ýagny syýahatçylara goşulan baha üçin salgyt yzyna gaýtarylyp berilýär. Ulgam Özbegistanyň Döwlet salgyt komiteti tarapyndan gurnaldy we häzirki wagtda ol synag tertibinde işleýär – diýip, Özbegistanyň howa menziliniň metbugat gullugy habar berýär.
Keşbek ýadygärlik sowgatlar, hoz, miwe we kakadylan miwe önümleri, deri we sütükli önümler, halylar, dokma önümleri we başga-da harytlaryň birnäçe görnüşine degişlidir.
Goşulan baha üçin salgydy yzyna gaýtaryp almak üçin Soliq ykjam programmasynda hasaba durmaly we onda satyn alnan harytlaryň çeklerini skanirlemeli. Howa menzilinde uçuş üçin hasaba alyşdan geçensoň, ýolagçy Tax Free işgärine ýüz tutup, uçar talonyny we harydyny görkezmeli.
Salgyt tölemezlik ulgamyna girýän satyn alnan harytlaryň umumy bahasy azyndan 1 million sum bolmaly. Şeýle hem, önüm açylmaly we ulanylmaly däldir. Salgyt komitetiniň işgärleri harytlaryň ähli şertlere laýyklygyny barlandan soň, keşbek berilýär.
Harytlaryň dürli görnüşleri üçin ýolagçy goşulan baha üçin salgydyň 90% -ine çenli yzyna gaýtaryp alyp biler. Nagt pul ýolagçynyň kartasyna geçirilýär we yzyna gaýtarylan aýyndan soňky aýyň 25-ne tölenýär.
ORIENT news
