Gyrgyzystanda aýdymçylara fonogramma ulanmagy gadagan etdiler
Ýurduň habarçylarynyň berýän habaryna görä, Gyrgyzystanyň Medeniýet ministrliginiň metbugat gullugynyň wekili: "2023-nji ýylyň 1-nji ýanwaryndan Gyrgyzystanyň artistlerine fonogramma ulanmak gadagan edildi" - diýdi.
Degişli buýruga Respublikanyň Medeniýet, maglumat, sport we ýaşlar syýasaty ministri Altynbek Maksutow gol çekdi.
Bu düzgün döwlet medeni we bilim edaralarynda - teatrlarda, filarmoniýa zallarynda, kinoteatrlarda, klublarda, muzeýlerde, kitaphanalarda guralýan çykyşlara degişlidir. Şeýle hem, artistler köpçülikleýin medeni çäreleriň dowamynda janly ses bilen çykyş etmeli bolarlar.
Buýrugyň ýerine ýetirilişine jogapkärçilik her bir edaranyň ýolbaşçylaryna degişlidir. Düzgüniň ýerine ýetirilişine Gyrgyzystanyň Medeniýet ministriniň hut özi gözegçilik eder – diýip, Gyrgyzystan Respublikasynyň Medeniýet ministrliginiň metbugat gullugynyň wekili mälim etdi.
ORIENT news
