FIFA-nyň başlygy Peläniň hormatyna her ýurtda bir stadiona onuň adyny dakmaklyga çagyrdy
Halkara futbol federasiýasy (FIFA) beýleki futbol guramalarynyň wekilleri bilen her ýurtda iň azyndan bir stadionyň adyny üýtgedip, dünýäniň üç gezek çempiony, futbolyň şasy, braziliýaly Peläniň adyny dakmaklygy ara alyp maslahatlaşýar.
Bu barada “Santos” futbol klubynyň öz stadionynda ady rowaýata öwrülen futbolçy bilen hoşlaşmak dabarasyna baran FIFA-nyň baştutany Janni Infantino habar berdi. Edil şol ýerde Pele öz futbolda oýnan oýunlarynyň köp bölegini geçiripdi.
“Men oňa muny gaýtarmaga geldim. Biz halkara federasiýalary bilen onuň hormatyna ýerli futbol çempionatlarynda her oýnuň öňünden bir minutlyk dymyşlyk yglan edilmegini gürleşdik. Ýöne biz şeýle hem her bir ýurtda iň azyndan bir stadionyň onuň hormatyna atlandyrylmagyny isleýäris. 50 ýyl, 100 ýyl geçer, biziň çagalarymyz bizden ol hakda sorarlar, bularyň ählisi Pele hakdaky ýadygärligi we hakydany has uzaldar” – diýip, Infantino nygtady we Peläniň mirasyny söz bilen beýan edip bolmajakdygyny belledi.
FIFA Peläniň hormatyna Sýurihdäki öz ştab-kwartiasynyň öňündäki baýdaklaryny aşak düşürdi.
ORIENT habarlar
Surat: armeniasputnik.am
