Türkmenistan we Türkiýe pagta ösdürip ýetişdirmek we ony mehanizasiýanyň kömegi bilen ýygmakda özara tejribe alyşdylar
Türkmenistanyň Oba hojalygy we daşky gurşawy goramak ministrliginiň we Türkiýäniň pagta boýunça ylmy-barlag institutynyň hünärmenleri Birleşen Milletler Guramasynyň Azyk we oba hojalyk edarasynyň (FAO) üsti bilen pagta ösdürip ýetişdirmek we ony mehanizasiýanyň kömegi bilen ýygmak boýunça tejribe alyşdylar.
Bu ugurdaky hyzmatdaşlyk Türkmenistan tarapyndan teklip edildi. Bu topragyň hasyllylygyny ýokarlandyrmaga, şeýle hem iki ýurtda hasylyň mehanizirlenen usulda ýygylmagynyň netijeliligini ýokarlandyrmaga ägirt uly goşant goşdy. Bu barada FAO-nyň Merkezi Aziýa boýunça sebitleýin utgaşdyryjysy Wiorel Gusu Trend agentligine habar berdi.
Türkmenistan bilen FAO-nyň arasyndaky hyzmatdaşlyk, ýurduň BMG-niň resmi agzasy bolaly bäri netijeli ösýär. Köp ýyllaryň dowamynda FAO tarapyndan Türkmenistanda alnyp barlan işler azyk howpsuzlygy, oba hojalygy we daşky gurşawy goramak bilen baglanyşykly köp ugurlary öz içine aldy.
Häzirki wagtda Aşgabatda FAO-nyň wekilhanasyny açmak baradaky meseläniň üstünde işlenilýär. Häzirki wagtda guramanyň Merkezi Aziýa ýurtlary boýunça sebitleýin wekilhanasy Ankara şäherinde ýerleşýär.
ORIENT news
Surat: uz.sputniknews.ru
