Hindistan 2036-njy ýylyň tomusky Olimpiýa oýunlaryny geçirmäge arza berer
Hindistanyň Ýaşlar we sport ministri Anurag Thakur Hindistanyň şu ýyl 2036-njy tomusky Olimpiýa oýunlaryny geçirmek üçin resmi taýdan arza berjekdigini aýtdy.
Times of India Thakuryň: “Men hökümetiň Hindistanyň olimpiýa assosiasiýasy bilen bilelikde ýurtda Olimpiýa oýunlaryny geçirmäge gatnaşyp biljekdigine ynanýaryn. Hindistanyň Olimpiýa oýunlaryna gatnaşmak üçin doly taýýarlanjakdygyna we arza bilen ýüz tutjakdygyna ynanýaryn. Hindistan sporty ösdürmek üçin şeýle tagallalar edýän bolsa, biz Olimpiýa oýunlaryny ýöne geçirmek bilen oňman, eýsem-de bolsa ýokary derejede bu işiň hötdesinden geljekdigimize ynandyrmak isleýärin. Hindistan 2036-njy ýyldaky Olimpiýa oýunlaryny geçirmek mümkinçiligine çynlakaý garaýar" – diýen sözlerini getirýär.
Şeýle hem, ministr şäheriniň Olimpiýa oýunlarynyň geçiriljek ýeri hökmünde Gujarat welaýatynda ýerleşýän Ahmedabad şäheriniň hödürlenendigini aýtdy. Hindistan ozal 1982-nji ýylda Aziýa oýunlaryny we 2010-njy ýylda Arkalaşygyň oýunlaryny kabul edipdi.
Hindistandan başga-da, 2036-njy ýyldaky tomusky Olimpiýa oýunlaryny geçirmek üçin Indoneziýa, Meksika, Günorta Koreýa, Müsür we Angliýa dalaş edýärler.
Mundan öň tomusky Olimpiýa oýunlary 2021-nji ýylda Ýaponiýanyň Tokio şäherinde geçirildi. Ilkibaşda olar 2020-nji ýylda geçirilmelidi, ýöne koronawirus pandemiýasy sebäpli, bir ýyl yza süýşürildi.
Oýunlaryň netijesi boýunça toparlaýyn hasapda ABŞ ýeňiş gazandy. Ikinji orunda – Hytaý, üçünji orun bolsa ýaryşyň ýer eýeleri ýaponlara mynasyp görüldi.
2024-nji ýylda tomusky Olimpiýa oýunlary Parižde (Fransiýa), 2028-nji ýylda – Los-Anželesde (ABŞ), 2032-nji ýylda bolsa, Brisbende (Awstraliýa) geçiriler.
ORIENT news
