Alymlar zenanlaryň erkeklere garanda has ýuka ýüreklidigini subut etdiler
Kembrij, Garward we Waşington uniwersitetlerinden hünärmenleriň topary, şeýle hem Bar-Ilan we Haýfa uniwersitetleriniň alymlary zenanlaryň kognitiw empatiýada, ýagny özgäniň pikirlerini we duýgylaryny kesgitlemek ukybynyň erkekleriňkiden artykmaçlygyny subut etdiler – diýip, Proceedings of the National Academy of Sciences (PNAS) žurnalynda çap edilen makalada aýdylýar.
Alymlar dünýäniň 57 ýurdundan dürli ýaşdaky 300 müň adamyň gatnaşmagynda ylmy-barlag işini geçirdiler. Gatnaşyjylardan “Pikiri gözlerden okamak” boýunça onlaýn-test geçmegi soradylar, onda suratdaky adamyň diňe gözüniň töweregindäki bölegini seljerip, onuň näme hakda pikir edýändigini ýa-da duýýandygyny haýsy sözüň has gowy beýan edýändigini saýlamalydylar.
Bu barlaglar zenanlaryň erkeklere garanda ortaça köp ball alandyklaryny görkezdi. Hünärmenler erkekleriň barlaglarynyň netijesiniň hiç bir ýurtda zenanlaryňkydan ýokary bolmandygyny nygtadylar.
Indi alymlar zenanlaryň erkeklerden has empatikdigini, ýagny ýuka ýüreklidigini ynamly beýan etdiler. Geljekki işlerde munuň sebäbiniň nämedendigini anyklamak meýilleşdirilýär.
ORIENT habarlar
Surat: unsplash.com
