Türkmenhowaýollary Abu-Dabi şäherine howa gatnawlaryny amala aşyryp başlady
“Türkmenistan” awiakompaniýasy Aşgabat bilen Abu-Dabiniň (BAE) arasynda uçar gatnawyny gaýtadan dikeltdiler we 23-nji dekabrda bu iki şäheriň arasynda ilkinji uçar gatnawyny ýerine ýetirildi – diýip, türkmen paýtagtynyň halkara howa menzilinde ORIENT-e gürrüň berdiler.
Uçuşlar her hepdäniň anna güni ýerine ýetirilýär. Aşgabatdan uçar 18:00-da uçýar, Abu-Dabiden yzyna bolsa 21:00-da ugraýar. Uçaryň biletiniň bahasy Türkmenhowaýollarynyň resmi saýtynda 28-nji dekabrdaky bahalara görä 5 müň 639 manat 80 teňňe görkezilýär. Biletiň kassadaky bahalary tapawutlanyp biler.
Mundan öň noýabr aýynda Birleşen Arap Emirlikleri daşary ýurtly syýahatçylar üçin ýurda giriş düzgünlerini üýtgetdiler, ýagny COVID-19 garşy PSR-testleri we sanjym barada sertifikatlary görkezmek zerurlygyny ýatyrypdylar.
Türkmenhowaýollary hepdäniň duşenbe we çarşenbe günleri Dubaýa uçuşlary amala aşyrmagy dowam edýärler. Şeýle hem awiakompaniýanyň uçarlary Moskwa, Kazana, Stambula we Frankfurta uçuşlary ýerine ýetirýärler.
ORIENT habarlar
Surat: redaksiýanyň arhiwinden
