Türkmen paýtagtynda çagalar üçin multfilmleriň festiwaly geçirildi
Ýetip gelýän Täze ýyl mynasybetli Aşgabadyň “Türkmenistan” kinokonsert merkezinde çagalar üçin multfilmleriň festiwaly geçirildi – diýip, ORIENT-iň habarçysy habar berýär.
Bu çäräniň gurnaýjylary bolup Türkmenistanyň Telewideniýe, radiogepleşikler we kinomatografiýa baradaky döwlet komitetiniň “Mahabat” müdirligi, Türkmenistanyň Magtymguly adyndaky Ýaşlar guramasy we Bazar Amanow adyndaky Çagalar kitaphanasy çykyş etdiler.
Kiçijik tomaşaçylar “Mahabat” müdirliginiň we Oguzhan adyndaky “Türkmenfilm” birleşiginiň 2D we 3D formatda döreden soňky animasiýa filmlerine hezil edip tomaşa etdiler. Olaryň döreden multfilmleriniň arasynda “Ýiten top”, “Tokarja we Ýeserje paýlaşmany öwrenýär”, “64 öýjük”, “Şärikli ekin-3” bar.
Çagalar uly ekranda özleriniň söýgüli gahrymanlaryny görenlerine, olara ýakyn bolanlaryna we bilelikde başdan geçirmeleriň birnäçesine gatnaşmaga şat boldular. Wiktorinanyň çäklerinde çagalar multfilmler baradaky soraglara uly höwes bilen jogap berdiler.
Aýaz babanyň we onuň agtyjagy Garpamygyň peýda bolmagy festiwala aýratyn öwüşgin çaýdy, çagalar olar bilen tans etdiler we täze ýyl kompozisiýalaryny ýerine ýetirdiler.
ORIENT habarlar
Surat: «Mahabat» müdirligi Döwletteleradio
