Ertekiler dünýäsiniň portaly: 1-nji ýanwarda Aşgabatda çagalar üçin täze ýyl spektakllary başlanar
Türkmenistanyň Döwlet arçasyna isleg bildirenleriň her biri gelip biler. Çagalar üçin sahnalaşdyrylan täze ýyl çykyşlary 1-nji ýanwarda başlanar. Ertekiler dünýäsine alyp barýan portal Aşgabatda Söwda-senagat edarasynyň uly zalynda açylar. Hut şol ýere ýurdumyzyň baş arçasynyň ýanyndaky täze ýyl çykyşlarynyň gahrymanlary barar.
Dizaýnerler baýramçylyk hereketleriniň ýaýbaňlandyryljak ýerini jadylaýjy şalyga öwürdiler. Zalyň merkezinde ajaýyp bezelen owadan arça bolup, ol öwşün atýan köp dürli bezeg serişdeleri we oýnawaçlar, her dürli reňkli yşyklandyryjylar bilen şugla saçýar. Bu ýerde ertekilerdäki mazmuny beýan edýän çykyşlar ýaýbaňlanar. Spektaklyň gahrymanlary çagalar hem-de gepleýän haýwanlardyr. Olar bilelikde Garpamygy we Aýazbabany gözläp, Täze ýyly halas etmek üçin täsinlikler dünýäsine ugrarlar.
Aşgabadyň baş arçasynyň ýanyndaky täze ýyl çykyşlary 10-njy ýanwara çenli dowam eder. Baýramçylyga ilki bilen dürli bäsleşikleriň ýeňjileri, mekdebinde ýokary bahalara mynasyp okaýan okuwçylar, “Döwletliler” köşgüniň çagalary, çagalar öýlerinde terbiýelenýänler hem-de üpjünçiligi pes maşgalalaryň çagalary çagyrylar. Täsin baýramçylykda ýurdumyzyň dürli künjeklerinden çagalaryň jemi ýüzlerçesi bolup görerler.
ORIENT news
