Merkezi Aziýa söwda-senagat merkezi we Hazar ýoly - sebitiň işleri
Özbegistanyň we Gazagystanyň Prezidentleri Şawkat Mirziýoýew we Kasym-Jomart Tokaýew penşenbe güni soýuzdaş gatnaşyklar hakymda şertnama we Özbegistan-Gazagystan döwlet serhedini kesgitlemek baradaky şertnama gol çekdiler. Mundan başga-da, iki ýurduň hökümetleriniň, ministrlikleriniň we pudaklaýyn edaralaryň, iri kompaniýalaryň derejesinde 15 resminama gol çekildi. Olaryň arasynda "Merkezi Aziýa" Halkara senagat hyzmatdaşlyk merkezini döretmek baradaky çarçuwaly hökümetara ylalaşyk bar.
– Halkara senagat hyzmatdaşlygy merkezi biziň döwletlerimiziň arasyndaky hyzmatdaşlygyň çuňlaşmagyna çynlakaý itergi bermeli. Akorda web sahypasynda berilýän habara görä, gepleşikleriň netijeleri boýunça geçirilen bilelikdäki metbugat brifinginde Gazagystanyň Prezidenti: “Täze merkez Merkezi Aziýanyň iň uly söwda we senagat merkezine öwrüler, şeýle hem ýurtlarymyzyň ulag we logistika mümkinçiliklerini giňelder” – diýip belledi.
Tokaýew 21-22-nji dekabr aralygynda Özbegistana döwlet saparyny amala aşyrdy. Duşuşygyň dowamynda taraplar sebitdäki söwda-ulag geçelgesiniň ösüşi barada-da pikir alyşdylar.
Gazagystanyň prezidenti:“Biz Transhazar halkara ulag ýoluny bilelikde ösdürmek babatda ylalaşdyk” - diýdi.
Gepleşikleriň dowamynda energiýa pudagynda, hususan-da uglewodorodlary üpjün etmek, üstaşyr geçirmek we gaýtadan işlemek boýunça hyzmatdaşlygyň geljegi ara alnyp maslahatlaşyldy.
Iki ýurduň ýolbaşçylary Merkezi Aziýanyň serhetüsti derýalarynyň baýlyklaryny tygşytly peýdalanmak boýunça ikitaraplaýyn işleri dowam etdirmek barada ylalaşdylar. Bu ugurda bar bolan meseleleriň çalt çözülmegi üçin bilelikdäki çäreleri görmegiň zerurlygy nygtaldy.
Şeýle hem, saparyň dowamynda 8 milliard dollarlyk söwda şertnamalary we maýa goýum şertnamalary baglaşyldy.
ORIENT news
