Türkmenistan Parlament diplomatiýasyny işjeňleşdirýär
Milli bähbitleri goramak, halkara hyzmatdaşlygyny, hukuk düzgün-tertibini ösdürmek, ýurduň ykdysady bähbitlerini öňe ilerletmek hem-de döwletiň dünýä derejesinde oňyn abraýyny kemala getirmek boýunça häkimiýet işiniň düzüm bölegi hökmünde Türkmenistanyň Parlament diplomatiýasy aýratyn işjeňligi bilen bellendi.
Ýanwar-noýabr aralygynda dürli döwletleriň we halkara guramalaryň wekilleri bilen duşuşyklaryň 31-si geçirildi. Mejlisiň deputatlary halkara bilermenleriň gatnaşmagynda okuw maslahatlarynyň 137-ne gatnaşdylar hem-de daşary ýurtlarda 21 iş saparlarynda boldular.
Şu döwürde Aşgabatda Merkezi Aziýa döwletleriniň we Russiýa Federasiýasynyň parlament forumy, MA-nyň we Russiýanyň zenanlar dialogy, Merkezi Aziýa döwletleriniň zenanlar dialogynyň her ýyl geçirilýän mejlisi boldy. Şolarda bu düzümde Türkmenistanyň başlyklyk etmeginiň netijeleri jemlenildi.
Ýylyň başyndan bäri, Halk Maslahatynyň – türkmen parlamentiniň ýokary palatasynyň başlygynyň baştutanlygyndaky wekiliýetleri Russiýa Federasiýasynyň Tatarystan Respublikasynda, Ýaponiýada, Russiýada, Koreýa Respublikasynda bolup, ýokary wezipeli ýolbaşçylar bilen gepleşikleri hem-de duşuşyklary geçirdiler. Halk Maslahatynyň başlygy Türki döwletleriň baştutanlarynyň geňeşiniň Samarkantda geçirilen mejlisine hormatly myhman hökmünde gatnaşdy.
Mundan başga-da, Aşgabatda Türkiýäniň we Azerbaýjanyň parlamentleriniň ýolbaşçylary, RF-niň Federal Ýygnagynyň Federasiýa Geňeşiniň başlygynyň orunbasary, Fransiýa Respublikasynyň Senatynyň “Fransiýa-Merkezi Aziýa” parlament dostluk toparynyň başlygy we beýlekiler bilen duşuşyklar geçirildi.
Milli parlamentiň ikitaraplaýyn we köptaraplaýyn diplomatiýasy ulgamynda şeýle netijeler anna güni Türkmenistanyň Ministrler Kabinetiniň giňişleýin mejlisinde beýan edildi.
ORIENT news
