Türki ýurtlaryň onunjy sammiti 2023-nji ýylda Gazagystanda geçiriler
Türki döwletleriň guramasynyň (TDG) ýubileý sammiti 2023-nji ýylda Gazagystanda geçiriler diýip, ýurduň prezidenti Kasym-Žomart Tokaýewiň metbugat-gullugy habar berýär.
Şeýle hem metbugat beýanatynda sişenbe güni Tokaýewiň TDG-niň baş sekretary Kubanyçbek Omuraliýewi kabul edip, ony bu wezipä bellenmegi bilen gutlandygy habar berilýär.
Tokaýewiň pikirine gňrä, häzirki günde türki halklaryň hyzmatdaşlygyny we jebisligini berkitmek üçin täsin gurama hökmünde TDG-niň eýeleýän orny we ähmiýeti ep-esli artdy. Gazagystanyň baştutany Gurama bilen köp döwletleriň hem-de halkara guramalarynyň söwda-ykdysady we medeni-ynsanperwer aragatnaşyklary giňeltmegi maksat edinýändigini nygtady.
2009-njy ýylda döredilen Türki dilli döwletleriň hyzmatdaşlyk geňeşi (Türki geňeş) 2021-nji ýylyň noýabrynda Stambulda geçen sammitinde adyny Türki döwletleriň guramasy diýip üýtgetmek kararyna geldi. Guramanyň düzümine Azerbaýjan, Gazagystan, Gyrgyzystan, Türkiýe we Özbegistan girýär, Türkmenistan hem-de Wengriýa synçy hökmünde gatnaşýar.
Geljek ýyl geçiriljek duşuşygyň öňýanyndaky sammit şu ýylyň noýabrynda Samarkantda geçirildi.
ORIENT news
